top of page

Түгээмэл асуулт, хариултууд

  1. Холбоонд хэрхэн хувь гишүүнээр элсэх вэ?

Баяжуулагч инженерүүд нь гишүүнчлэлийн бүртгэлийн маягтыг бөглөх шаардлагатай. Маягтыг цахимаар бөглөх аль эсвэл холбооны оффист ирээд бөглөх боломжтой. Хэрэв оффист ирж анкет бөглөх бол 1 хувь цээж зурагтай ирнэ үү.

Цахим анкетын холбоосыг.


Үүний дараа цахим бүртгэлийн маягт дээрх Хас банкны данс руу гишүүнчлэлийн хураамж болох 50 000₮-ийг шилжүүлсэн баримтаа холбооны mmpa@mmpa.mn и-мэйл хаягаар ирүүлснээр таны гишүүнчлэл баталгаажна.

Жич: Холбооны гишүүнчлэлийн бүртгэлийн маягт 2018 оны 02-р сарын Удирдах зөвлөлийн хурлын шийдвэрийн дагуу шинэчлэгдсэн тул тус оноос өмнө анкет бөглөсөн гишүүд анкетыг шинэчлэн дахин бөглөх шаардлагатайг анхаарна уу.

Холбооны гишүүний эрх, үүргийн талаар холбооны дүрмээс дэлгэрэнгүй уншиж танилцана уу.


1. Холбооны гишүүнчлэл хэр урт хугацаатай байдаг вэ?

Хувь гишүүдийн гишүүнчлэл тухайн жилийн хэдэн сард элссэнээс үл хамааран тухайн оныг дуустал хүчинтэй.

Гишүүн байгууллагын гишүүнчлэл гэрээ байгуулсан өдрөөс тодорхой хэдэн жилийн турш үргэлжлэхээр байгуулагдах бөгөөд гэрээний хүчинтэй байх хугацаа хүртэл хүчинтэй байна. Жишээ нь: 2022 оны 06 сарын 09-нөөс эхлэн 3 жилийн хугацаатай гэрээ байгуулсан бол 2025 оны 06 сарын 09-ний өдөр хүртэл гишүүнчлэл хүчинтэй гэсэн үг юм.


2. Холбоонд хэрхэн байгууллагаар гишүүнчлэл үүсгэх вэ?

Гишүүн байгууллагын эрх, үүрэг болон ангиллыг тодорхойлж заасан “Гишүүнчлэлийн харилцааг зохицуулах журам”-ыг 2018 оны 06-р сарын 20-ны өдрийн удирдах зөвлөлийн хурлын 03 тоот тогтоолоор баталсан. Тус журамд заасан гурван ангилал болон тэдгээрт харгалзах эрх, үүрэгт тулгуурлан тухайн байгууллага сонголтоо хийсний үндсэн дээр хоёр тал зөвшилцөж хамтран ажиллах гэрээ байгуулснаар байгууллагын гишүүнчлэл үүснэ. Гишүүн байгууллагуудад холбоонд гишүүнчлэлтэйг илтгэх батламжийг олгоно.


3. Холбооны гишүүдэд үнэмлэх олгох уу?

Гишүүнчлэлийн үнэмлэхийг улирал бүрийн төгсгөлд хэвлэн, энэ тухай гишүүдэд мэдэгдэх бөгөөд мэдээлэл авсан гишүүд холбооны оффисоос ирж гишүүнчлэлийн үнэмлэхээ авах үүрэгтэй. Гишүүнчлэлийн үнэмлэх нь цаашид холбоонд идэвхтэй байсныг гэрчлэх, мөн тухайн жилийн бүх гишүүдийн хуралд оролцох эрхийг үүсгэдэг. Өөрөөр хэлбэл хурлаар хэлэлцэж буй асуудалд бүх гишүүдээс санал авах үед өөрсдийн саналыг гишүүнчлэлийн үнэмлэхээрээ баталгаажуулна.


4. Баяжуулагчдыг ажилд зуучлах боломжтой юу?

Холбооны дүрэмд гишүүн байгууллагууд холбооны гишүүдээс ажиллах хүчнийг бүрдүүлэхэд дэмжлэг үзүүлж ажиллахаар заасан байдаг. Үүний дагуу 2018 оноос “Хүний нөөцөд бүртгүүлэх мэргэжилтний анкет”-ыг ажил хайж буй мэргэжилтнүүдээр бөглүүлж, ажилд зуучлуулах боломжийг бүрдүүлэн ажиллаж байна.

Цахим анкетын холбоосыг дор оруулав.

Тус анкетыг бөглөсний дараа холбоонд ирүүлсэн ажлын байрны зар мэдээллийг и-мэйлээр тогтмол хүргүүлэх бөгөөд хэрэв ажилд орсон тохиолдолд эргэн холбоонд и-мэйлээр мэдэгдэх шаардлагатайг анхаарна уу.


5. Холбоонд гишүүнээр элсэх ямар ашигтай вэ?

Холбоонд гишүүнээр элссэнээр дараах давуу талууд бий болно. Үүнд:

  • Холбооноос долоо хоног бүр хүргүүлэх “Баяжуулагч” мэдээг тогтмол хүлээн авч салбарын цаг үеийн мэдээ мэдээллээр хангагдах,

  • Холбооноос зохион байгуулж буй төлбөртэй хурал семинарт 25%-ийн хөнгөлөлттэй үнээр хамрагдах. Мөн холбооноос эрхлэн гаргасан ном товхимлыг мөн адил хөнгөлөлттэй үнээр авах,

  • Олон улсад зохион байгуулагдаж буй хурал зөвлөгөөн, сургалт, вебинарын мэдээллийг авах,

  • Холбоогоор дамжуулан төрийн байгууллагуудад өөрсдийн дуу хоолойг хүргэх,

  • Холбоогоор дамжуулан олон улсын туршлага солилцох сургалт хөтөлбөр, хурлуудад хамрагдах,

  • Холбооноос хариуцан ажиллах төсөл хөтөлбөрүүдэд хамрагдах, хамтран ажиллах,

  • Салбартай холбоотой шаардлагатай мэдээллүүдийг холбоонд бичгээр хүсэлт гарган авах,

  • Холбооноос жилд 2 дугаар эрхлэн гаргадаг “Баяжуулагч” сэтгүүлийн дугааруудыг үнэгүй авах,

Мөн салбарын болон холбооны цаг үеийн мэдээллийг цаг алдалгүй авахыг хүсвэл дараах холбоосоор орж бидэнтэй нэгдээрэй.


6. Холбоотой хамтран ажиллах, хяналт сорьцлолтын ажил хийлгэх болон технологийн аудит хийлгэх, зөвлөх үйлчилгээ авах боломжтой юу?

Холбоонд бичгээр хүсэлт гаргаснаар холбоотой хамтран ажиллах санамж бичиг байгуулах, хамтран төсөл судалгааны ажил гүйцэтгэх болон холбооны зүгээс мэргэжилтэн судлаачдыг зуучлуулах боломжтой. МАМБХолбоо нь үйлдвэрийн хяналт сорьцлолт, технологийн аудит хийж байсан туршлагатай. Бид чадварлаг мэргэжилтнүүдээр баг бүрдүүлэн тухайн ажлыг ажлын даалгаврын дагуу чанарын өндөр түвшинд гүйцэтгэнэ.


7. Мэргэшсэн болон зөвлөх инженерийн сургалт, сунгалтад хэрхэн хамрагдах вэ?

Тус бүрд харгалзах тавигдах шаардлага, бүрдүүлэх материалын жагсаалтыг http://mmpa.mn/ веб хуудаснаас авч, материалуудыг бүрдүүлэн mmpa@mmpa.mn и-мэйл хаягаар ирүүлснээр сургалтад бүртгүүлэх хүсэлт үүснэ. Ирүүлсэн материалыг холбооны менежер шалган дутуу материалыг нэмж бүрдүүлснээр сургалтын бүртгэлд хамрагдана. Үүний дараа шалгуур хангасан мэргэжилтнүүд сургалт болон сунгалтдаа хамрагдах боломжтой болно.

Жич: Бүрдүүлэх материалын ерөнхий загварыг и-мэйлээр холбогдох болон веб хуудаснаас авна уу.


8. Мэргэжлийн сургалт зохион байгуулдаг уу?

Холбоонд ирүүлэх хүсэлтдээ сургалтын агуулга, үргэлжлэх хугацаа, хаана зохион байгуулах зэрэг мэдээллийг дэлгэрэнгүй бичиж ирүүлснээр тухайн шаардлагад нийцэх хөтөлбөрийг холбооны зүгээс боловсруулан та бүгдэд санал болгох боломжтой. Мөн холбооноос зохион байгуулж байсан өмнөх сургалтуудын хөтөлбөр, хичээлийн агуулга багш нарын ерөнхий каталогоос шаардлагатай хичээлүүдийг сонгон сургалтын хөтөлбөрөө боловсруулан харилцан тохиролцох бүрэн боломжтой.


9. Холбоо зөвхөн баяжуулагч мэргэжилтэй хүмүүсийг элсүүлдэг үү?

Баяжуулагч, металлургич мэргэжилтэй болон ашигт малтмал баяжуулалтын чиглэлээр ажиллаж буй инженер, судлаачид гишүүнээр элсэхэд нээлттэй.

Та бүхэн гишүүний эдлэх эрхээс гадна гишүүний үүргээ биелүүлж, үйл ажиллагаатай холбоотой санал хүсэлтээ холбоонд хүргүүлж, холбооноос зохион байгуулж буй арга хэмжээнүүдэд идэвхтэй хамрагдаарай.


10. Баяжуулагч сэтгүүлд хэрхэн нийтлэл өгөх вэ?

“Баяжуулагч” сэтгүүлийг холбооны залуу гишүүдийн санаачилгаар 2018 оноос эхлэн жилд 2 дугаарыг эрхлэн гаргаж, өдгөө 8 дугаар (2700 орчим ширхэг)-ыг хэвлэн, 1800 орчим сэтгүүлийг гишүүд, дэмжигчиддээ хүргүүлээд байна. Тус сэтгүүлд 5 болон 11-р сард хэвлэгдэн дараачийн сараас эхлэн гишүүдэд тараагддаг. “Сэтгүүлд нийтлэл хүлээн авах удирдамж”-ийн шаардлагыг хангаж, редакцийн зөвлөлөөр хянагдсан илтгэл, нийтлэлийг үнэ төлбөргүй хэвлэж олны хүртээл болгох бөгөөд сэтгүүлд материал нийтлүүлсэн хүн бүр тус сэтгүүлээс 2 ширхэгийг авах эрхтэй. Та бүхэн сэтгүүлд нийтлэл ирүүлэхээр бэлдэж буй бол тус удирдамжийг веб хуудаснаас татаж авна уу. Удирдамжид заасан хугацаанд багтаан материалаа чанарын шаардлагын дагуу бэлтгэн mmpa@mmpa.mn и-мэйл хаягаар ирүүлээрэй.


Жич: Сэтгүүлд хэвлүүлэхээр ирүүлсэн нийтлэлд холбооны зүгээс ямар нэгэн хариуцлага хүлээхгүй болохыг анхаарна уу.


 
 
 
bottom of page